Li gade d'a Richard

Par Jean de la Marck

Nèni, djî n'va nin fé on « remake » di l'istwère d èl bikète d'a Moncheû Seguin èle finih bin trop ma. Dji va pus vite raconter  çou qu'a- st'arivé a m'binamé vwezin Richard, li ci qui saye dè fé tchoûki quéques  porês, dès rècènes, dès djotes divins on cot'hè à costé di m' mohone.

Tos lès d'jous a matin, Richard pormonne, Calin, si p'tit tchin (Jack Russel) tot ava l'cwartî di Naimette –Xhovémont sô lès hôteûrs di Ste Wabeû. Come li p'tite bièsse sètche bêcôp so l' lahe, èl lèt   bizé tot-ava lès jèbes ét lès hayes.Di- tins in tins tot sintant avou s'grognon, i trôve totes sôrts d'afères. Ine fèye c'est dès cartes di banke, in ôte djoû c'è- st-ine potchète avou dès papîs di vwètures, il a minme situ tchoûkî s'grognon divins on trô wice qui n-aveût on r'na ; rèzultat : cwate ponts d' suture so s'trufe.  

On bê djoû, i vin tô près d'ine mohone avou on cot'hè d'vant. Tot d'on côp il ètind brêre ine feume avou in acsant ètrindjîr » aller sale bête foute le camp d'ici ». Richard s'i d'mande çou qu'i s'passe. I s'aproche è veû ine kimère qui tchoûke ine gade avou on ramon po l'èvoyî so l' pavêye. Richard tûze inte di lu minme : qu'èst qu'ine gade vint fé chal èl cwène. I vint tôt près dèl pôve bièsse et liî  carèsse si baubichète. A s'moumint là, i- n'a ne pitite saqwè qu'i s'passe  inte zèls deûs. Mutwèt,  on houhou. Alez sèpî ? Richard si ristoune po'n'nè ralé è s'mohone. Awè, mins ni vola- t'i nin qui l' biquète si mèt à sûre Richard comee on ptit tchin. Ni sèpant qwè fé, i dècida, divantt li situwacion, dè  rivni po li pt'tit bwès qui abouti à costé di s'djârdin, çoulà po n'nin qu'on l'veuse sol' boulevard dès  Hauteurs avou in gade à s'cou. Arivé a's'mohone, i drouve l'ouh ét fê intrer l'gade po l'fé d'hinde è djardin. I houke, Maggy, si feume, po lî mostrer  çou qu'il a raminé. Comme di djuss, çoulà n'a fê nou pleû, Maggy a brèt a sécoûr tot lî d'hant di mète li bièsse a d'foû dèl mohone.

Tot pèneus (dj'aléve dire li cowe è cou) Richard ramina li gade, todi à s'cou, divins li p'tit bwès podrî m'mohone. I tuzéve mutwèt qui l' gade aléve dimani tote seûle è bwès. On moumint d'né, volà l'gade qui fètt ine pihote . Richard s'aporçût qui l'gade n'èst nin ine gade mins on bouk. I louke di pûs près, drouve dès- oûys come dès sarlètes, et comprind qui d'ttvan lu il a ine gade qui n'est nin ine gade et  on bouk qui n'est nin tot- a- fêt on bouk. Bin, dit-st-i vo-m' la bin èmantchî. On bouk et gade ! I n'a qu'à mi qu'arive dès- afères parèyes. D'on côp, il aboule è m'djardin avou todi s' bouk et gade a cou. Mi feume qu'es- t -éve è s' couhène louke po li f'niesse et veu  l'cope qui d'hind ad'lé lèy. Ele drouve l'ouh d'èle couhène tot s'dihant qui Richard a- st -on novê tchin. Li tins dè dîre ouf, volà  l'bouk et gade qui mousse èlcouhène et broke tot dreû è salon  po- z-aler magnî li bèle fougère da Bonnemine, mi feume. So l' tin qu'èle brêt o sécour, mi p'tit fi Ludovic saye d'assètchî l'biesse po lî d'ner on bokèt d'pan. Awè, twè, mins vola-t-nin qu'èle vint soukî so l'èfant, l'èvoyant lès qwate fiérs è l'êr sos'cou. Li pôve Richard tuzéve a çou qu'il aléve poleur fé avou ne biesse insi. Bonnemine si d'manda di wice qu' èle vinéve. Por mi èle s'a saver d'ine cinse ou bin dès Coteaux dèl Citadelle. Bonnemine a –st-ine idèye, pocwè n'nin l'aminer al cinse as èfants di Ste Wabeû. Là on èst sûr di trover dès gades. Ele ni fet  ni l'eune ni deus, èle prind ne cwède po l'mète a hatrê dè bouk et gade.

Richard ènn'ala tot sètchant li fasse bikète podrî lu. Al cinse as- èfants on l'a bin volou lprinde po on moumint sêulemint car i- s'avît dédjà on couyu. Portant i n'aveut nou dandjî avou nosse bouk et gade. Ricard a tot l'minme passé po l'commissariat d'èl police po déclaré li disparacion

A djoû d'oûy, li pôve biesse esy co todi so plèce. Richard, avou s'bon coûr, lî  a stu  dire on p'tit bondjoû et  lî fé ine pitite doudoûce.

Damadje po l'bikète da moncheu Seguin, èle areut mi fêt dè toumer so Richard pus vite qui so l'leup.